𝐐𝐚𝐲𝐛𝐭𝐢𝐢 𝐬𝐚𝐝𝐝𝐞𝐱𝐚𝐚𝐝

Diblomaasiyad Qaran Mise Dano Qofeed? Xidhiidhka Dibadda oo Is Rogay

Madaxweyne Xasan Sheekh wuxuu xukunka kusoo laabtay iyadoo siyaasadda arrimaha dibadda ay sal dhigatay, dalkana uu kala yeeshay saaxiibo dhab ah, cadow laga hortagayo iyo qaar dano isdhaafsi yaryar na dhex maraan. Waxaa isku faham iyo isku dareen noqday 𝐝𝐨𝐰𝐥𝐚𝐝𝐝𝐢𝐢 iyo 𝐒𝐡𝐚𝐜𝐚𝐛𝐤𝐢𝐢. 

𝐋𝐚𝐛𝐚 𝐬𝐚𝐧𝐨 𝐤𝐚𝐝𝐢𝐛; 

Madaxweyne Xasan wuxuu ka fogaaday saaxiibadii dhabta ahaa, wuxuu u gacan galay cadawgii la iska ilaalinaayey.

Wuxuu soo gaaray haddeer, meel ay cadawgii ka dareereen markay qodxo badan u aaseen keddib. 

Saaxiibadii dhabta ahaa waxay tuseen iney dadka iyo dalka mar walba garab u yihiin. 𝐒𝐨𝐨 𝐱𝐮𝐬𝐮𝐮𝐬𝐨 𝐬𝐢𝐝𝐢𝐢 𝐗𝐚𝐬𝐚𝐧 𝐒𝐡𝐞𝐞𝐤𝐡 𝐮𝐮 𝐮 𝐦𝐚𝐚𝐠𝐢 𝐣𝐢𝐫𝐚𝐲 𝐄𝐫𝐢𝐭𝐫𝐞𝐚 𝐢𝐲𝐨 𝐬𝐢𝐝𝐚𝐲 𝐮 𝐰𝐚𝐧𝐚𝐚𝐣𝐢𝐲𝐞𝐞𝐧 𝐡𝐚𝐝𝐝𝐞𝐞𝐫.

Siyaasaddii arimaha dibadda ee ku dhisneyd 𝐝𝐚𝐧 𝐪𝐚𝐫𝐚𝐧 wuxuu u rogay Madaxweynaha 𝐱𝐢𝐫𝐢𝐢𝐫 𝐪𝐨𝐟𝐞𝐞𝐝 oo dano shakhsi lagu maalo. 

Waxaa dhumay halbeegii wax lagu cabbiri jiray oo idil. Dalal is neceb ama uu loolan adag u dhexeeyo baa lala galay heshiisyo isku wada nooc ah, oo haddana is wada burinaya. Heshiisyada amniga iyo difaaca, dowladuhu waxay la saxiixdaan wadamada ay isku danta yihiin ama ay wadaagaan khataro isku mid ah. Dib u milicso inta dowladeed ee lala saxiixday heshiis amni ama iskaashi difaac. 

Madaxweyne Xasan markuu bannaanka joogay, wuxuu si joogta ah jaal ula ahaa dowlad walba oo ay isku dhaceen madaxdii dalka xukumaysay, ficil iyo fagaarana wuxuu dhabarka jabaniyey dowladdii Somaaliyeed.

Maantase, ha ogaado Madaxweynaha, hadday dal shisheeye ah danaha qaranka dartiis isugu dhacaan inaan garab u nahay. Sababtuna waxay tahay, dowladaha adduunka sidii ay noogu kala qaybsanaayeen shalay, bey maantana noo kala yihiin. Kuwii cadawga ahaa, qodxihii ay Madaxweyne Farmaajo u dhigeen waa kuwaa iyagoon waxba ka baddalin qorshahoodii maantana ku duminaya Dowladda Soomaaliyeed.

𝐓𝐚𝐥𝐨: 

Mudane Madaxweyne, 

Siyaaadda Arrimaha Dibadda ka dhig ajande qaran oo ay kula leeyihiin Guddiga Amniga Qaranka, waadna haysataa dad khibrad leh. Fadlan, ka dhaaf habkaan ka arradan qabka umadnimo iyo aqoonta diblamaasiyadeed.